كثيرة هي الأمور الي بتمييزنا إحنا كبشر٫ حسب إعتقادي كلها سببها تطوّري الي بحكي قصّة ملايين السنين من التطور والإنتقاء الطبيعي. 

وحده من هاي الأمور هي النزعة الموجودة عنا الكل في إنزال المسؤلية عن أنفسنا. دايمًا بيجي عنا هاذ الميول في إنه نبرىء أنفسنا من المسؤلية ومن التأثير على الأمور الي بتهمنا. 

هاذ النمط من التفكير بتسمى باللغة الإنجليزيّة Reactive او كيف بحب أسميّه في اللغة العربيّة الشخص المُدار٫ أي الشخص الي بعطي الظروف والأحداث هي تحدد كيف هو بشعر وبالتالي كيف بتصرّف وكيف بتكون ردّة فعله. 

هون٫ عند الأشخاص اصحاب هذا النمط من التفكير٫ منسمع كثير جمل مثل “أكلولي٫ شربولي٫ عملولي”٫ او “مهو انا ولدة في كذا وكذا” او “كله بسبب الوضع٫ الوضع المادي٫ السياسي وغيرها”٫ او مرات جمل مثل “لإني عربي” او “مأنا بنتمي لهذه الطائفة او هذيك”. هيك أشخاص دائمًا منسمع منهم لوم لأشخاص أو جهات ثانيّة مثل الحكومة٫ الإدارة او الأهل. 

وما تفهومني غلط٫ أحيانًا عنجد الأوضاع بتكون صعبه٫ عنجد بكون في لوم كبير على جهات معيّنه او بكون نشأة الإنسان بحسب الصدفة الجغرافيّة لولادته مش هويّنه.

الأشخاص المُدارين دايمًا رح يحاولوا إيجاد طرق لإلقاء اللوم على أطرف أخرى٫ وأحيانًا فعلًا في لوم كبير على الأطراف الأخرى٫ لكن في مثل في اللغة الانجليزيه بقول: No Matter how sharp you slice it there are always two sides. 

اي انه من غير المهم قدي حاد منقسّم قطعة معيّنه٫ دايمًا رح نطلع مع قسمين. 

واذا كل شخص فينا بده ينزّل المسؤلية عن نفسه ويعتبر حياته صعبه وغير قابله للتغيير بسبب ظروف معيّنه هو ما أختارها٫ كيف رح ييجي أشخاص مثل مارتن لوثر كينچ؟ منوين رح ييجي مبادرات إجتماعيّة إن كان في مجالات مثل المساواة الجندريّة٫ حقوق العمال٫ تطوير الثقافه والتعليم والإزدهار الإقتصادي. 

وعشان هيك للإنسان في قدرة معيّنه موجودة عند كل شخص فينا٫وهي القدرة في الإختيار والقرار. 

ومثل ما توني روبنس قال: “في لحظة قرارنا٫ مصيرنا بتحدد”.

وفعلًا٫ هون منقدر نكون Proactive او مُديرين في اللغة العربيّة. لأنه صحيح٫ في أمور ما منقدر نتحكّم فيها في الحياة٫ مثل الطقس٫ مثل كيف بعاملنا الشخص الي قبالنا٫ مثل حوادث الي بتصير مع الإنسان بشكل طبيعي.

لكن٫ الكل بوافقني انه صحيح ما عنا القدرة نتحكّم في المطر٫ لكن منقدر نختار اذا يصيبنا إحباط ونقعد في البيت٫ او نستغل الوقت في البيت٫ او حتى في أشخاص بتطلع تركض تحت المطر. 

ويمكن ما منقدر نحدد للشخص الثاني انه ما يعاملنا بطريقة غير محترمة٫ لكن منقدر نقرر اذا نرد بنفس الطريقة او نحس بالسوء٫ او إنه نوخذ مسؤلية ونحل الأمور بطريقة ديبلوماسيّة. 

من هون حابب كل شخص فيكم يسأل نفسه هاي الأسئلة:

كيف توجهك في الحياة؟ هل بتكتفي في المعرفه السطحيّة ولا بتفكر انه دائمًا لازم تبحث وتكون في تعلّم متواصل؟

كيف توجهك تجاه التغيير؟ هل بتعتبره عدم راحة ولا فرصه للتقدّم؟

كيف توجهك في الشغل؟ هل بتنجز الي عليك وبتقعد٫ ولا دائمًا بتحاول تخلق فرص جديدة وتزيد من فعاليّة عملك فوق شو مطلوب منك؟ الي طبعًا في الحالة الثانيه هذول هني الأشخاص الإحتماليّة الأكبر انهم يترقوا في عملهم لمناصب أعلى٫ بينما القسم الأول رح عالق في نفس المنصب او العمل لعشرات السنوات من الروتين والملل.

واذا بدنا نلخّص الفرق بين طريقة التفكير منقدر نقول إنه دائمًا رح يكون في أحداث في حياتنا٫ الشخص المُدار رح يركّز على الأمور الي ما بقدر يتحكّم فيها٫ والشخص المُدير رح يركّز على الأمور الي بقدر يتحكّم فيها٫ وبخذ مسؤلية على تسويّة الأمور لنتائج فعّاله. 

ومثل ما دايمًا بقول: “إذ قمت بتكريس نصف الجهد الذي تبذله في التذمر على أمور٫ في تحسين هذه الأمور٫ لن يكون هناك أي أمر تتذمر عليه”. 

لما نتعلّم نوخذ مسؤليّة على حياتنا٫ مشاعرنا٫ وردات الفعل الي عنا بغض النظر عن الظروف والأحداث الي بتصير معنا٫ وفقط عنها٫ ممكن نتحرر من العبوديّة لهاي الظروف ونقود حياتنا نحو الأفضل وتحقيق أنفسنا في هذا العالم.

أغلبنا منمرق أو مرقنا تجارب صعبة في العلاقات العاطفيّة٫ الي أحيانًا بتنتهي في مآسي مثل خداع٫ خيانة أو إبتعاد مفاجئ بدون مبرر.

طبيعي في مثل هيك فترات نمرق في حالات نفسيّة صعبة٫ ممكن نهمل شغلنا٫ نهمل أصحابنا والناس الي حوالينا٫ وحتى ممكن يبطّل في عنا نفس للأكل أو لأي إشي ثاني. 

اما المشكلة بتصير لما قسم منّا بخلّي الشخص الي غلبه في نهاية العلاقة٫ غلبة في الفترة الصعبة بعد الإبتعاد٫ في التعامل مع مشاعر الخيانة٫ في التذنيب الذاتي وغيرها٫ بتخليه يغلبة كمان مرّة!

أو بالأحرى يغلبة كل حياته لما بقول: ”أنا بطّلت أمّن لحدا“. 

حتى لو منقولها بطريقة غير واعية٫ لكن بتضل عقدة جواتنا. 

وهالعقدة بتخلينا نصير نتجنّب علاقات جدية٫ لإنه منكون خايفين يرجع يصير معنا مثل ما صار بالعلاقة السابقة. 

أو منفوت بعلاقات لكن منضلّ كابحين أنفسنا عن إنه نحب ونتعلّق عشان خايفين نيقع كمان دور. 

الاشي الي ما مننتبهله هو إنه٫ ولحسن الحظ٫ أصابع إيديك مش مثل بعض. 

كل البشر مختلفين٫ في الخاينين٫ في اللطيفين٫ في الي بتقدر توثق فيهن٫ وفي الخبيثين.

المسألة هي إنه ما تخلّي إلي صار يكسر٫ وإنما يعلّمك. يعلّمك كيف تكشف الشخص عحقيقته وشو ممكن يتصرّف من بداية العلاقة٫ وهناك تكون قوي كفاي لحتى تقرر إذا تكمّل معاه أو لأ.

أما إنك تقفّل باب العلاقات في جنزير متين وقفل فقط لإنه الإكس كان خاين٫ عنيف٫ حقود أو خبيث٫ فهاذ بالضبط بعطيه الصلاحيّة إنه يغلبك٫ أو تغلبك٫ كمان مرّة في حياتك المستقبليّة. 

شغله إلي أكيد ما بستحقها. 

الشخص الصح لهاي الفترة زو لكل الحياة ممكن يكون كثير قريب٫ ما تكون ضعيف وتبّعد عنّة فقط لأجل شخص غلط كان بفترة غلط. 

بفكّر هاذ واحد من أكثر المواضيع إلي تم نقاشها في كل مرة تقتل إمرأة. 

أولًا٫ كلنا كمجتمع مستنكرين للعنف بجميع أشكاله وضد أي فئة كانت بغض النظر عن الجنس٫ الدين٫ اللون٫ الميول وغيره٫ ولكن؛

مهم جدًا نفرّق بين ضحايا العنف إلي هو ثقافة مازالت مستشريّة في مجتمعنا بتنتج شجارات بين الناس٫ تصفية حسابات٫ نزاعات شخصيّة وغيره٫ وبين العنف الجندري. 

ببساطة لإنه المرأة٫ بشكل عام٫ ما بتنتقل عشان صفّة سيارة٫ ولا عشان دخلت في شجار مع جارتها٫ ولا عشان بتحب تفرض سيطرتها على الشارع والي بحكي معها بتطخّه أو بطخّها٫ المرأة تقتل لسبب واحد - لإنها إمرأة. 

كونها إمرأة هاذ شيء ما اختارته٫ ما إلها علاقة فيه وما بتقدر تغيّره. هاذ يختلف تمامًا عن إنها تكون ضحيّة بسبب فِعِل قامت فيه. 

مجرّد كونها إمرأة هاذ بخليها تكون مُعرّضة للعنف والقتل بغض النظر عن إذا عملت شيء أو ما عملت؛ وهاذ ناتج عن المنظومة الذكوريّة تبعت المجمتع٫ عن مكانة المرأة المتدنية٫ عن سلطويّة الرجل على المرأة٫ وعن قلّة التمثيل النسائي في السياسة٫ الدين وغيرها من مراكز اتخاذ القرار الي بتقدر فيها تسمّع صوتها. 

مكانة المرأة في المجتمع لوحدها بتخليها تكون فئة مستضعفه٫ بالرغم من إنها مش أقليّة٫ والي بخليها تكون عُرضه لعنف كلامي٫ جسدي وجنسي. 

تمامًا مثل ما أقليات وفئات مستضعفة أخرى معرّضين أكثر للعنف مثل ذوي الاحتياجات الخاصّة (السخرية كمان عنف كلامي)٫ المُسنين٫ المثليين٫ وغيرهم.

بفكر طبيعي نتعاطف أكثر من جهة٫ ومن جهة ثانية كمان نفصل بين العنف الي يمارس على فئات معيّنه لأسباب ما اختارتها كفئة - مثل الجندر٫ العمر٫ الميول٫ والإعاقة - وبين العنف إلي ناجم عن اتخاذ فعل معيّن٫ خطوة معيّنة او لمجرّد كون الإيچو تبعنا كثير عالي وما منسمح لحدا يقلنا "زيح سيارتك". 

النساء تُقتل لكونهن نساء٫ لكونهن عايشات في منظومة بتبرر العنف ضدهن بحجّة "الشرف" أو "التأديب" أو لمجرّد إنه "لازم تسكت عشان بيتها واولادها".

لهيك - لازم نتوجّهله بشكل مُستقل٫ مُنفصل٫ ومباشر.